३.५८

^{३.५८.१}भृशमाव्रजमानस्य तस्याधोवामलोचनम्
प्रास्फुरच्चास्खलद्रामो वेपथुश्चास्य जायते

^{३.५८.२}उपालक्ष्य निमित्तानि सोऽशुभानि मुहुर्मुहुः
अपि क्षेमं तु सीताया इति वै व्याजहार ह

^{३.५८.३}त्वरमाणो जगामाथ सीतादर्शनलालसः
शून्यमावसथं दृष्ट्वा बभूवोद्विग्नमानसः

^{३.५८.४}उद्भ्रमन्निव वेगेन विक्षिपन्रघुनन्दनः
तत्र तत्रोटजस्थानमभिवीक्ष्य समन्ततः

^{३.५८.५}ददर्श पर्णशालां च रहितां सीतया तदा
श्रिया विरहितां ध्वस्तां हेमन्ते पद्मिनीमिव

^{३.५८.६}रुदन्तमिव वृक्षैश्च म्लानपुष्पमृगद्विजम्
श्रिया विहीनं विध्वस्तं संत्यक्तवनदैवतम्

^{३.५८.७}विप्रकीर्णाजिनकुशं विप्रविद्धबृसीकटम्
दृष्ट्वा शून्योटजस्थानं विललाप पुनः पुनः

^{३.५८.८}हृता मृता वा नष्टा वा भक्षिता वा भविष्यति
निलीनाप्यथ वा भीरुरथ वा वनमाश्रिता

^{३.५८.९}गता विचेतुं पुष्पाणि फलान्यपि च वा पुनः
अथ वा पद्मिनीं याता जलार्थं वा नदीं गता

^{३.५८.१०}यत्नान्मृगयमाणस्तु नाससाद वने प्रियाम्
शोकरक्तेक्षणः शोकादुन्मत्त इव लक्ष्यते

^{३.५८.११}वृक्षाद्वृक्षं प्रधावन्स गिरींश्चापि नदीन्नदीम्
बभूव विलपन्रामः शोकपङ्कार्णवप्लुतः

^{३.५८.१२}अस्ति कच्चित्त्वया दृष्टा सा कदम्बप्रिया प्रिया
कदम्ब यदि जानीषे शंस सीतां शुभाननाम्

^{३.५८.१३}स्निग्धपल्लवसंकाशां पीतकौशेयवासिनीम्
शंसस्व यदि वा दृष्टा बिल्व बिल्वोपमस्तनी

^{३.५८.१४}अथ वार्जुन शंस त्वं प्रियां तामर्जुनप्रियाम्
जनकस्य सुता भीरुर्यदि जीवति वा न वा

^{३.५८.१५}ककुभः ककुभोरुं तां व्यक्तं जानाति मैथिलीम्
लतापल्लवपुष्पाढ्यो भाति ह्येष वनस्पतिः

^{३.५८.१६}भ्रमरैरुपगीतश्च यथा द्रुमवरो ह्ययम्
एष व्यक्तं विजानाति तिलकस्तिलकप्रियाम्

^{३.५८.१७}अशोकशोकापनुद शोकोपहतचेतसं
त्वन्नामानं कुरु क्षिप्रं प्रियासंदर्शनेन माम्

^{३.५८.१८}यदि ताल त्वया दृष्टा पक्वतालफलस्तनी
कथयस्व वरारोहां कारुष्यं यदि ते मयि

^{३.५८.१९}यदि दृष्टा त्वया सीता जम्बुजाम्बूनदप्रभा
प्रियां यदि विजानीषे निःशङ्कं कथयस्व मे

^{३.५८.२०}अथ वा मृगशावाक्षीं मृग जानासि मैथिलीम्
मृगविप्रेक्षणी कान्ता मृगीभिः सहिता भवेत्

^{३.५८.२१}गज सा गजनासोरुर्यदि दृष्टा त्वया भवेत्
तां मन्ये विदितां तुभ्यमाख्याहि वरवारण

^{३.५८.२२}शार्दूल यदि सा दृष्टा प्रिया चन्द्रनिभानना
मैथिली मम विस्रब्धः कथयस्व न ते भयम्

^{३.५८.२३}किं धावसि प्रिये नूनं दृष्टासि कमलेक्षणे
वृक्षेणाच्छाद्य चात्मानं किं मां न प्रतिभाषसे

^{३.५८.२४}तिष्ठ तिष्ठ वरारोहे न तेऽस्ति करुणा मयि
नात्यर्थं हास्यशीलासि किमर्थं मामुपेक्षसे

^{३.५८.२५}पीतकौशेयकेनासि सूचिता वरवर्णिनि
धावन्त्यपि मया दृष्टा तिष्ठ यद्यस्ति सौहृदम्

^{३.५८.२६}नैव सा नूनमथ वा हिंसिता चारुहासिनी
कृच्छ्रं प्राप्तं हि मां नूनं यथोपेक्षितुमर्हति

^{३.५८.२७}व्यक्तं सा भक्षिता बाला राक्षसैः पिशिताशनैः
विभज्याङ्गानि सर्वाणि मया विरहिता प्रिया

^{३.५८.२८}नूनं तच्छुभदन्तौष्ठं मुखं निष्प्रभतां गतम्
सा हि चम्पकवर्णाभा ग्रीवा ग्रैवेय शोभिता

^{३.५८.२९}कोमला विलपन्त्यास्तु कान्ताया भक्षिता शुभा
नूनं विक्षिप्यमाणौ तौ बाहू पल्लवकोमलौ

^{३.५८.३०}भक्षितौ वेपमानाग्रौ सहस्ताभरणाङ्गदौ
मया विरहिता बाला रक्षसां भक्षणाय वै

^{३.५८.३१}सार्थेनेव परित्यक्ता भक्षिता बहुबान्धवा
हा लक्ष्मण महाबाहो पश्यसि त्वं प्रियां क्वचित्

^{३.५८.३२}हा प्रिये क्व गता भद्रे हा सीतेति पुनः पुनः
इत्येवं विलपन्रामः परिधावन्वनाद्वनम्

^{३.५८.३३}क्वचिदुद्भ्रमते वेगात्क्वचिद्विभ्रमते बलात्
क्वचिन्मत्त इवाभाति कान्तान्वेषणतत्परः

^{३.५८.३४}स वनानि नदीः शैलान्गिरिप्रस्रवणानि च
काननानि च वेगेन भ्रमत्यपरिसंस्थितः

^{३.५८.३५}तथा स गत्वा विपुलं महद्वनं; परीत्य सर्वं त्वथ मैथिलीं प्रति
अनिष्ठिताशः स चकार मार्गणे; पुनः प्रियायाः परमं परिश्रमम्